La cultura da construcziun pertutga tuts. En moda directa u indirecta: Nus tuts furmain ils lieus, nua che nus abitain, vivain e lavurain. Co che nus construin e co che nus giain enturn cun quai ch'è construì, mussa tge ch'è impurtant per nus.
En la cultura da construcziun sa mussa la multifariadad da la societad. Per che questa multifariadad possia vegnir mantegnida, tgirada e sviluppada vinavant en moda orientada a la qualitad, dovri in dialog cumplessiv. Latiers tutgi che persunas spezialisadas da differentas disciplinas sa barattian, che pretensiuns vegnian accordadas bain ina cun l'autra e ch'ils umans al lieu sa participeschian en moda activa. Tuts duain pudair cundecider, co che nus vulain concepir nossa convivenza.
L'Uffizi federal da cultura (UFC) promova quest vast dialog. El collia servetschs federals, autoritads, organisaziuns e federaziuns chantunalas. El entretscha persunas spezialisadas da differentas disciplinas e sustegna metodas e formats inter- e transdisciplinars. El promova il barat cun l'economia e cun la societad civila.
