Promover la cultura. Rinforzar la diversitad.

L’Uffizi federal da cultura promova la lavur culturala en sia diversitad ed en sia qualitad e rinforza la participaziun da la populaziun a la vita culturala. El gida a preservar ed a rinforzar l’impurtanza dal patrimoni cultural per la societad e s’engascha per ina cultura architectonica persistenta e d’auta qualitad. Ultra da quai sustegna el la cultura d’amaturs, las tradiziuns vivas e l’artisanadi tradiziunal e promova la plurilinguitad sco er la chapientscha tranter ils territoris linguistics e culturals. Sin plaun internaziunal s’engascha l’Uffizi federal da cultura per la protecziun dal patrimoni cultural e da la diversitad culturala. El è responsabel per diversas instituziuns, tranter quellas la Biblioteca naziunala svizra.