Art d’urer e mecanica d’art
Categoria: know-how en connex cun l’artisanadi tradiziunal
L’uraria fa part oz en Svizra d’ina realitad moderna ed industriala d’ina dimensiun globala. Ella cumpiglia però er lavurs e cumpetenzas quasi exclusivamain manualas che furman la basa da l’uraria sco patrimoni cultural. Questa dinamica è particularmain visibla en la mecanica d’art, numnadamain en il sectur da la fabricaziun d’automats e da stgatlas da musica a Sainte-Croix: ella ha mantegnì ses status sco artisanadi ed ha rendì sias abitantas e ses abitants ordvart superbis. Ellas ed els discurran dal «spiert da Sainte-Croix» sco segn dal respect per la lavur artisanala. Questa candidatura metta en evidenza la rolla da la furmaziun en l’uraria e da l’inschign uman ch’è anc adina indispensabel per l’innovaziun e per la precisiun tecnica. Er sche quest know-how è en emprima lingia d’impurtanza economica, ha el er influenzà l’urbanistica e la realitad sociala quotidiana da las regiuns pertutgadas e dispona d’ina atgna simbolica, nua che la precisiun, la raffinezza mecanica e la temporalitad èn colliadas stretgamain ina cun l’autra e che influenzeschan en moda remartgabla las identitads localas e regiunalas.
Ils 16 da december 2020 ha il 15avel Comité interguvernamental per preservar il patrimoni cultural immaterial inscrit il know-how en la domena da l’art d’urers e da la mecanica d’art (Svizra e Frantscha) sin la glista represchentativa dal patrimoni cultural immaterial.
Uffizi federal da cultura
Secziun da cultura e societad
Hallwylstrasse 15
3003 Berna