La secziun Cultura da construcziun da l'Uffizi federal da cultura (UFC) è Voss post central per tut ils aspects da la cultura da construcziun. Persunas spezialisadas internas ed externas associadas s'occupan tant da las dumondas da la tgira da monuments, da l'archeologia e da la protecziun dal maletg dal lieu sco er da la promoziun d'ina auta cultura da construcziun en ils projects da construcziun e da planisaziun actuals.
Sco post spezialisà da la Confederaziun per la cultura da construcziun realisescha la secziun la politica da la cultura da construcziun naziunala ed internaziunala da la Confederaziun e tschertga la collavuraziun cun tut las acturas ed ils acturs. El examinescha las consequenzas dals projects federals per il patrimoni construì. El elavura l'Inventari federal dals lieus svizzers d'impurtanza naziunala degns da protecziun (ISOS). Ultra da quai sustegna el cun agids finanzials il mantegniment e la tgira da maletgs da lieus archeologics, da lieus e da monuments. El promova projects ed organisaziuns che s'engaschan en l'entira Svizra per temas da la cultura da construcziun.
