L'Uffizi federal da cultura (UFC) promova in'auta cultura da construcziun cun agids finanzials en las trais categorias objects, projects ed organisaziuns. Contribuziuns ad objects conceda il UFC en collavuraziun cun ils chantuns. Cuminaivlamain sustegnan la Confederaziun ed ils chantuns mesiras archeologicas sco er il mantegniment e la tgira da monuments e da maletgs da lieus.
En la categoria projects sustegna il UFC projects da perscrutaziun, formats per la scolaziun e la furmaziun supplementara da persunas dal fatg ed iniziativas en il sectur da l'intermediaziun e da la furmaziun da la cultura da construcziun.
Er ad organisaziuns ch'èn activas en tut la Svizra e che s'engaschan per la protecziun da la patria, per la tgira da monuments e per la promoziun d'ina auta cultura da construcziun po il UFC conceder agids finanzials. Ellas servan a mantegnair ed a tgirar il patrimoni construì ed a realisar ed a derasar las strategias, las finamiras e las missivas da la Confederaziun en la politica davart la cultura da construcziun.
