Concept da la cultura da construcziun

Plazza centrala a Bienna (BE).
© UFC / foto Rolf Siegenthaler

Umans èn activs en il spazi ed al furman en tut sia diversitad. La cultura da construcziun è ina manifestaziun da quai. Ella cumpiglia edifizis e cuntradas, monuments architectonics e maletgs dals lieus, vias e plazzas, punts e curtins sco er vitgs e citads. Process da planisaziun e da construcziun èn er ina part da la cultura da construcziun. Tala resguarda tant il detagl artisanal sco er la planisaziun a scala engrondida d'abitadis . La cultura da construcziun collia il passà cun il preschent e cun l'avegnir. Co che nus tractain noss ambient construì, è l'expressiun da nossa cultura da construcziun.

Saja quai sco abitant u sco architecta – tut ils umans caracteriseschan lur spazi da viver. Il medem mument furma quel la convivenza da mintga singula e singul. Il resultat d'ina auta cultura da construcziun èn citads e vitgs simpatics, nua ch'i vala la paina da viver, che sa transfurman cun las pretensiuns da la societad e che mantegnan a medem temp lur atgnadads istoricas. Ella metta en il center ils basegns socials ed in agir che spargna resursas e stgaffescha ina plivalur economica.
Debattas, tractativas e discurs enritgeschan la cultura da construcziun. Das la societad civila sur l'economia sco er sur federaziuns, fundaziuns ed uniuns fin a las autoritads ed a la politica vegnan tuts supplitgads da s'engaschar per in'auta cultura da construcziun.

L'Uffizi federal da cultura (UFC) è il post spezialisà per cultura da construcziun da la Confederaziun. El s'engascha per la promoziun d'ina auta cultura da construcziun en Svizra e coordinescha las activitads da la cultura da construcziun da la Confederaziun cun la strategia da la cultura da construcziun. Il UFC promova l'intermediaziun e la furmaziun da la cultura da construcziun sco er la furmaziun da cumpetenzas respectivas tar persunas spezialisadas. En quest connex s'engascha el per ina collavuraziun adequata cun tut las acturas e tut ils acturs.