Il Departament federal da l'intern DFI tschertga ina/in
EXPERTA U EXPERT PER LA SVIZRA EN IL COMITÉ D'EXPERTAS E D'EXPERTS PER LA CHARTA EUROPEICA DA LAS LINGUAS REGIUNALAS U MINORITARAS
La Charta europeica da las linguas regiunalas u minoritaras (CS 0.441.2) è vegnida concludida l'onn 1992 a Strassburg. En Svizra è questa convenziun vegnida ratifitgada l'onn 1997 ed entrada en vigur il 1. d'avrigl 1998. L'intent principal da la Charta è la protecziun e la promoziun da la diversitad linguistica sco in dals elements ils pli prezius da la vita culturala europeica. Ils stadis contractants s'obligheschan da rediger mintga tschintg onns in rapport davart la situaziun da las linguas regiunalas e minoritaras sco er davart las mesiras prendidas per realisar la Charta.
Il Comité d'expertas e d'experts è in gremi independent ch'evaluescha la realisaziun da la Charta en ils stadis contractants. El è responsabel per realisar il ciclus da monitoring ch'è previs tenor la Charta. Il Comité d'expertas e d'experts ha l'incumbensa d'examinar la situaziun da las linguas regiunalas u minoritaras en mintga stadi, da communitgar al Comité dals ministers ses giudicament areguard l'observaziun da las obligaziuns tras ina partida contractanta e – nua che quai è applitgabel – da supplitgar la partida contractanta d'extender pass per pass sias obligaziuns. Mintga stadi contractant po delegar ina commembra u in commember en il comité. Las expertas ed ils experts ageschan independentamain dal stadi incaricant ed èn emprima lingia responsabels per evaluar la situaziun da las linguas regiunalas e minoritaras en auters stadis contractants. Ellas ed els vegnan elegids per ina perioda da sis onns e pon vegnir reelegids ina giada.
Il mandat n'è betg pajà; ils custs da viadi, da pernottaziun e d'alimentaziun vegnan dentant indemnisads cun ina pauschala per di che vegn pajada dal Cussegl da l'Europa tenor ses urden da gestiun.
L'experta u l'expert da la Svizra vegn tschernì dal Comité dals ministers dal Cussegl da l'Europa or d'ina glista che sto cuntegnair almain trais propostas dal DFI.
INCUMBENSAS
Sco commembra u commember ordinari dal Comité d'expertas e d'experts
• Sa participar a las trais dietas plenaras che han lieu mintga onn durant plirs dis a Strassburg.
• Sa participar a las visitas en in auter stadi contractant; en quest connex ha mintga experta u expert la responsabladad da rapportar davart in pajais e da rediger il rapport d'evaluaziun.
Retschaiver il Comité d'expertas e d'experts a chaschun da sia visita en Svizra, sa participar a la discussiun concernent la deliberaziun dal rapport davart la Svizra.
Chaussas generalas
• Cooperar a mesiras da sensibilisaziun, a debattas ed ad occurrenzas concernent las linguas regiunalas u minoritaras sco er a render enconuschenta la Charta, particularmain en Svizra.
QUALIFICAZIUNS E CUMPETENZAS NECESSARIAS
Tenor las prescripziuns dal Cussegl da l'Europa
• Integritad, independenza envers las autoritads ed imparzialitad en l'execuziun dal mandat.
• Cumpetenzas specificas cumprovadas, q.v.d.
- enconuschientschas giuridicas cumplessivas en dretg constituziunal u en dretg internaziunal u
- experientscha en almain in dals secturs da la vita publica pertutgads da la Charta (furmaziun, medias, giustia, administraziun publica, cultura, fatgs socials e vita economica), cun accent sin dumondas en connex cun las linguas minoritaras u
- cumpetenza u spezialisaziun cumprovada sin il sectur da la politica da linguas.
• Bunas cumpetenzas linguisticas dal franzos u da l'englais, ch'èn las linguas uffizialas e las linguas da lavur dal Cussegl da l'Europa.
• Disponibladad da temp per pudair ademplir efficaziamain il mandat.
Ulteriuras pretensiuns
• Bunas enconuschientschas da las instituziuns svizras e da la situaziun da las linguas regiunalas e minoritaras en Svizra.
• Gronda cumpetenza sociala ed abilitad exprimida da lavurar en in team.
• Enconuschientschas excellentas d'almain duas fin trais linguas naziunalas da la Svizra.
Giavischà vegn plinavant
• Enconuschientschas u experientschas areguard il Cussegl da l'Europa e sias metodas da lavurar u experientscha en ina posiziun da responsabladad en il sectur da las relaziuns internaziunalas.
Vossa annunzia
Tramettai per plaschair Vossa annunzia ensemen cun Voss curs da la vita en franzos u en englais, utilisond il model dal curs da la vita dal Cussegl da l'Europa (da retrair sin dumonda tar kultur_gesellschaft@bak.admin.ch ) fin ils 3 da schaner 2022 per e-mail a: kultur_gesellschaft@bak.admin.ch
Ulteriuras infurmaziuns
Uffizi federal da cultura, Secziun Cultura e societad, Fiona Häusler, tel. +41 58 462 49 51
