Tradiziunalmain ha la Svizra in'auta cultura da construcziun. Blers vitgs e numerusas citads demussan autas qualitads areguard il spazi, areguard l'architectura ed areguard l'artisanadi. Grazia a quai ch'els èn situads en bels lieus en la cuntrada, grazia a lur ierta culturala ed a lur centers tgirads bain tutgan els tar attracziuns frequentadas fitg bain. Per che quai restia uschia e per ch'els possian ademplir ils giavischs da la societad er en l'avegnir, dovri concepts culturalmain persistents ed orientads a la qualitad per als sviluppar vinavant.
En ina moda e maniera multifara prenda la Confederaziun influenza sin la cultura da construcziun. Ella procura per prestaziuns da construcziun e da planisaziun ed administrescha construcziuns autas e bassas. Ella redigia basas normativas e conceda approvaziuns dals plans e dat concessiuns. Ella deliberescha subvenziuns per projects e per programs. En tut questas activitads ha el en mira in'auta cultura da construcziun. En spezial tar sias incumbensas s'oblighescha ella da prender resguard da cuntradas, da maletgs da lieus e dal patrimoni construì.
L'Uffizi federal da cultura (UFC) coordinescha la promoziun d'ina auta cultura da construcziun da la Confederaziun. El sustegna ils chantuns cun cussegls e sviluppa purschidas da furmaziun supplementara. Sco post spezialisà da la Confederaziun examinescha el las consequenzas da projects da la Confederaziun e da ses instituts per il patrimoni construì.
