Qualitad

L'ascensur da Hammetschwand sin il Bürgenstock (NW) ademplescha las pretensiuns da segirezza odiernas ed è in punct d'orientaziun en la cuntrada.
© UFC / foto Rolf Siegenthaler

Lieus da qualitad contribueschan a la sanadad ed al bainstar dals umans e procuran per ina societad democratica e solidarica. Pervia da quai è qualitad in tema central tar mintga activitad en il spazi. In mantegnair, in planisar ed in construir che s'orientescha a la qualitad signifitga d'ir enturn en moda spargnusa cun surfatschas da terren e da las sviluppar cun quità, da rinforzar l'identitad da centers da vitgs e da citads, da tgirar en quest connex edifizis istorics e da cumplettar quels cun implants attractivs moderns. Er construcziuns d'infrastructura sco vias u zonas da mastergn meritan ina qualitad concepziunala.

Qualitad en il spazi è ina incumbensa communabla. Ella dovra l'attenziun da nus tuts ed avess da porscher pussaivladads per sa participar. Bunas cundiziuns generalas giuridicas stgaffeschan la basa per in svilup dal territori duraivel, studis dals fatgs da planisaziun e da construcziun s'orienteschan vi d'aspects qualitativs e proceduras sco concurrenzas d'architectura e da planisaziun promovan la qualitad da la cultura da construcziun.

L'Uffizi federal da cultura (UFC) gida a meglierar ed a segirar la qualitad da la cultura da construcziun cun coordinar la politica da la cultura da construcziun da la Svizra sin plaun naziunal e sin plaun internaziunal. El elavura la basa e sviluppa manuals ed instruments simpels per descriver e per identifitgar la qualitad da la cultura da construcziun. El sa participescha a l'elavuraziun da normas e da standards. El examinescha las consequenzas dals projects da la Confederaziun e da ses instituts sin il patrimoni construì ed el s'engascha per fatgs da planisaziun, da construcziun e da surbajegiada cun qualitad.