Convenziun da l’UNESCO davart la protecziun dal patrimoni cultural subaquatic

Il maletg mussa dus sfunsaders che examineschan e mesiran il vrac da la nav a vapur «Jura» sfundrada en il Lai da Constanza.
Lavurs da mesiraziun vi dal vrac da la nav a vapur «Jura» sfundrada il 1864 en il Lai da Constanza (TG).
© Amt für Archäologie Thurgau / Global Underwater Explorers Team Bodensee, www.archaeologie.tg.ch

Ina part essenziala dal patrimoni cultural sa chatta sut l'aua: las mars ed ils lais zuppan numerusas perditgas dal passà uman sco cuntradas da cultura, abitadis, sanctuaris, ports e vracs da bastiments. Quests relaschs umans han ina gronda valur culturala, pertge els dattan perditga da nossa istorgia da millennis e millennis ed els èn savens preservads fitg bain. La Convenziun davart la protecziun dal patrimoni cultural subaquatic da l'UNESCO creescha reglas impegnativas en accord cun il dretg internaziunal per proteger il patrimoni cultural sut l’aua e gida d'impedir che quest patrimoni cultural vegnia sblundregià ed explotà vinavant en tut il mund. 60 stadis fan fin ussa part da la convenziun; la Svizra ha ratifitgà ella il 2020.

Ils lais, ils flums e las palids en Svizra zuppan in ritg patrimoni cultural da tut las fasas da l'istorgia da l'uman. Il pli enconuschent èn forsa ils abitadis dals palissaders che tutgan dapi il 2011 tar il Patrimoni cultural mundial da l'UNESCO « Palafittas preistoricas enturn las Alps». Cun la ratificaziun da la convenziun è la Svizra s'obligada da s'occupar cun quest relasch a moda responsabla, da sancziunar destrucziuns e sblundregiadas e da cumbatter il commerzi illegal cun objects dal patrimoni cultural subaquatic. Bastiments en viadi sin las mars dal mund sut bandiera svizra na dastgan ni destruir ni donnegiar grevamain il patrimoni cultural subaquatic. Scuvertas ed activitads planisadas ston vegnir annunziadas a las autoritads.

L'Uffizi federal da cultura (UFC) procura che la Svizra observia las obligaziuns da la convenziun.

Ultima midada 14.06.2021

Tar il cumenzament da la pagina

Contact

Uffizi federal da cultura
Secziun Cultura da construcziun
Hallwylstr. 15
3003 Berna
Telefono +41 58 462 86 25
E-Mail

Stampar il contact

https://www.bak.admin.ch/content/bak/rm/home/baukultur/archaeologie-und-denkmalpflege/unterwasser-kulturerbe.html