Furmaziun musicala

Foto_Header
© Tabea Reusser

Ils 23 da settember 2012 han il pievel ed ils chantuns acceptà cun ina gronda maioritad il conclus federal davart la promoziun e la furmaziun musicala dals giuvenils. Il nov artitgel constituziunal (art. 67a Cst.) ha sco finamira da rinforzar la furmaziun musicala en spezial dals uffants e dals giuvenils. La Confederaziun ed ils chantuns s'engaschan – en il rom da lur cumpetenzas – per ina instrucziun musicala d'auta qualitad en scola. En il temp liber duain ils uffants ed ils giuvenils avair la pussaivladad da pratitgar in'activitad musicala. Ils giuvenils particularmain talentads vegnan ultra da quai sustegnids en moda speziala.
 L'Uffizi federal da cultura (UFC) sustegna la furmaziun musicala dals uffants e dals giuvenils ordaifer l'instrucziun en scola. El sustegna finanzialmain projects da furmaziuns musicalas sco er concurrenzas e festivals. Ultra da quai maina il UFC il program «Giuventetgna e Musica» (G+M).

Ultra da las associaziuns da musica da laics èn las scolas da musica subvenziunadas dal stadi preschentas en tut las regiuns dal pajais sco acturas impurtantas da la furmaziun musicala en Svizra.
Tut ils uffants e giuvenils duain disponer da las medemas schanzas en connex cun la furmaziun musicala. L'art. 12 da la Lescha davart la promoziun da la cultura (LPCu) prevesa perquai che las scolas da musica subvenziunadas dal stadi han fin la fin dal stgalim secundar II tariffas ch'èn cleramain sut quellas per persunas creschidas. Ultra da quai sto vegnir tegnì quint da la situaziun economica dals geniturs u d'autras persunas obligadas da pajar aliments sco er dals basegns pli gronds da furmaziun da las scolaras e dals scolars musicalmain talentads. Las scolas da musica defineschan sezzas e senza prescripziuns da la Confederaziun en tge cas ch'i vegnan concedidas tariffas socialas e spezialas ed en tge autezza.
Questas mesiras han sco finamira da garantir l'access egual dals giuvenils a l'instrucziun da musica. L'onn 2018 ha il UFC examinà ils effects da questa disposiziun tras in'enquista en tut las scolas da musica da la Svizra. Ils resultats da l'evaluaziun stattan a disposiziun en tudestg. Ina resumaziun dal rapport d'evaluaziun è disponibla en franzos ed en talian.

Contact

Uffizi federal da cultura
Secziun da cultura e societad
Hallwylstrasse 15
3003 Berna
Telefono +41 58 462 49 51
E-Mail

Stampar il contact

https://www.bak.admin.ch/content/bak/rm/home/sprachen-und-gesellschaft/musikalische-bildung.html