L'Uffizi federal da cultura promova la plurilinguitad en Svizra.
La promoziun da la plurilinguitad e da la chapientscha tranter las cuminanzas linguisticas gioga ina rolla impurtanta en la politica da linguas svizra. Las disposiziuns politicas e giuridicas concernent las linguas èn francadas en la Constituziun federala. L’artitgel 4 definescha las quatter linguas naziunalas da la Svizra (tudestg, franzos, talian e rumantsch), l’artitgel 18 renconuscha il princip da la libertad da lingua, e l’artitgel 70 determinescha las linguas uffizialas da la Confederaziun e regla las cumpetenzas chantunalas e federalas per la realisaziun da la politica da linguas da la Confederaziun.
La Lescha e l'Ordinaziun davart las linguas naziunalas e la chapientscha tranter las cuminanzas linguisticas èn en vigur dapi l'onn 2010. Questas disposiziuns concretiseschan l'incumbensa constitutiva da l'artitgel 70 da la Constituziun federala.
La lescha e l'ordinaziun reglan quatter champs:
- il diever da las linguas uffizialas da la Confederaziun e la promoziun da la plurilinguitad en il servetsch public;
- las mesiras per promover la chapientscha ed il barat;
- il sustegn per ils chantuns plurilings;
- il mantegniment e la promoziun da la lingua e da la cultura rumantscha e taliana.
Per promover meglier la plurilinguitad en l'administraziun federala e sin basa da duas intervenziuns parlamentaras da l'onn 2012 (la moziun Maire 12.3828 e la moziun da la Cumissiun d'instituziuns politicas dal Cussegl dals chantuns 12.3009) ha il Cussegl federal concludì la revisiun da l'Ordinaziun da linguas ils 27 d'avust 2014. Per stgaffir cundiziuns da basa legalas cleras e coerentas èn vegnidas revedidas a medem temp las Instrucziuns dal Cussegl federal davart la promoziun da la plurilinguitad en l'administraziun federala (Instrucziuns davart la plurilinguitad).
Ils 6 da fanadur 2016 ha il Cussegl federal avert ina procedura da consultaziun davart ina midada da la Lescha da linguas. Il Cussegl federal vul rinforzar la posiziun da las linguas naziunalas en l'instrucziun da linguas da la scola obligatorica e garantir l'armonisaziun. Sin basa dals resultats da la consultaziun publica davart il project ha il Cussegl federal decidì da na midar la lescha. El ha però incumbensà il Departament federal da l'intern (DFI) da giuditgar danovamain la situaziun ensemen cun la Conferenza svizra da las directuras e dals directurs chantunals da l'educaziun publica (CDEP), en cas che l'armonisaziun da l'instrucziun da linguas na pudess betg pli vegnir garantida.
