.jpg)
La Confederaziun sustegna 18 scolas svizras a l'exteriur en tut il mund: Bangkok, Barcelona, Bogota, Catania, Lima, Madrid, Milaun (cun ina scola filiala a Como), Mexico (cun scolas filialas a Cuernavaca ed a Querétaro), Bergamo, Roma, Santiago, Sao Paulo (cun ina scola filiala a Curitiba), Singapur e Peking. Ella sa basa en chaussa sin la Lescha federala dals 21 da mars 2014 davart las scolas svizras a l'exteriur (LSSE) e sin l'Ordinaziun dals 28 da november 2014 davart las scolas svizras a l'exteriur (OSSE). L'organ consultativ è la Cumissiun per l'intermediaziun da la furmaziun svizra a l'exteriur.
Las scolas svizras a l'exteriur èn scolas privatas d'utilitad publica ch'èn confessiunalmain neutralas e che vegnan frequentadas d'uffants svizzers, d'uffants dal pajais ospitant e d'uffants da terzs stadis. L'instrucziun è biculturala ed almain bilingua; ella permetta l'integraziun en il sistem educativ da la Svizra sco er dal pajais ospitant. Mintga scola svizra a l'exteriur ha in chantun da patrunadi che ha ina funcziun da cussegliaziun e da surveglianza pedagogica.
Cun la nova lescha federala vul la Confederaziun promover er la furmaziun professiunala en las scolas svizras a l'exteriur, sche quella maina ad in diplom renconuschì en Svizra (art. 5 LSSE). Ultra da quai èn previsas en la lescha agids finanzials per la fundaziun e per l'installaziun da novas scolas svizras a l'exteriur (art. 4 al. 2 lit. e LSSE ed art. 11 OSSE).
Sin basa da l'artitgel 14 LSSE e dals artitgels 8 fin 10 OSSE promova la Confederaziun la scolaziun da giuvnas Svizras e giuvens Svizzers a l'exteriur er ordaifer las scolas svizras a l'exteriur, en spezial tras contribuziuns per singulas persunas d'instrucziun svizras en scolas tudestgas e franzosas a l'exteriur sco er tras contribuziuns per curs u per l'acquist da material didactic.
Il Departament da l'intern ha approvà il zercladur 2016 la «Strategia davart l'ulteriur svilup da la rait da las scolas svizras a l'exteriur». La finamira da questa strategia èsi da sviluppar vinavant la rait: l'impurtanza da la furmaziun e da la cultura svizra a l'exteriur duai vegnir rinforzada. Cun contribuziuns per la fundaziun da novas scolas po la Confederaziun influenzar l'installaziun da novas scolas svizras a l'exteriur. Ultra da l'installaziun da novas scolas svizras a l'exteriur po la Confederaziun sustegnair projects strategicamain impurtants er en autras furmas ed influenzar uschia il svilup da la rait. La strategia permetta da structurar la discussiun e definescha prioritads geograficas sco er furmas pussaivlas per il sustegn.
