En Svizra vivan var 30 000 persunas d'origin jenic ed intgins tschient Sinti e Manouches. Circa 2000 fin 3000 da quels han ina moda da viver nomada: l'enviern vivan els sin ina plazza da staziunament e da la primavaira fin l'atun èn els en gir cun lur rulottas, sa ferman sin plazzas da transit e visitan lur clientas e clients. Cumbain ch'ina gronda part da questa minoritad na viva betg – u na viva betg pli – sin viadi, è il "viagiant" in element central da l'identitad jenica e sinti. Dapi plirs tschientaners fan ils Jenics ed ils Sinti part da la diversitad culturala da la Svizra.
Sin basa da l’artitgel 17 da la Lescha federala davart la promoziun da la cultura (LEC) po la Confederaziun prender mesiras per promover la cultura dals Jenics e Sinti e per als pussibilitar ina moda da viver viagianta.
L'Uffizi federal da cultura UFC s'engascha per meglierar las cundiziuns da vita dals Jenics e dals Sinti. El sustegna organisaziuns da questas minoritads e subvenziunescha projects per il mantegniment da la lingua e da la cultura jenica.
