La Confederaziun promova la retschertga applitgada sin il champ da plurilinguitad. La promoziun duai pussibilitar l’elavuraziun, la valurisaziun e la diffusiun dad enconuschientschas e cumpetenzas particularmain per il plurilinguissem sin nivel scolastic ed en la societad. La basa legala èn art. 17 LLing ed art. 12 OLing.
Per quest intent ha l’UFC dapi l’onn 2011 stipulà divers contracts da prestaziun cun l’Institut da plurilinguitad da l’Universitad e la Scola auta pedagogica da Friburg. En il rom da quest contract da prestaziun surpiglia il “Center scientific da cumpetenza per la plurilinguitad” da sviluppar in program da retschertga applitgada en secturs divers sco la scola, l’administraziun publica ni la societad. Plirs projects èn realisads en collavuraziun cun partenaris da retschertga da tut las regiuns linguisticas.
Il center da cumpetenza è plinavant responsabels da mantegnair ina rait naziunala da retschertga e da manar in center da documentaziun. La lavur è sustegnida d’ina gruppa d’accumpagnament che sa cumpona da represchentants dals uffizis federals e dals chantuns, sco era d’in cussegl scientific che evaluescha regularmain la retschertga dal center.
