A basa da la Lescha da linguas LLing (art. 22) e da l’Ordinaziun da linguas OLing (art. 18 e 25) sustegna la Confederaziun ils chantuns Grischun e Tessin per mantegnair e per promover la lingua e la cultura rumantscha e taliana.
Ils agids finanzials che la Confederaziun conceda a quests dus chantuns èn destinads per:
- sviluppar mesiras chantunalas generalas per il mantegniment e per la promoziun da la lingua e da la cultura rumantscha e taliana (translaziuns, publicaziuns, sensibilisaziun, instrucziun, sustegn da projects e.u.v.);
- sustegnair organisaziuns ed instituziuns che surpiglian incumbensas surregiunalas per mantegnair e per promover la lingua e la cultura rumantscha e taliana;
- promover l’activitad editoriala en las regiuns da lingua rumantscha e taliana;
- sustegnair l’activitad editoriala e las medias stampadas rumantschas;
- sustegnair l’Osservatorio linguistico della Svizzera italiana tar sias activitads da retschertga e da promoziun da la lingua taliana.
L’onn 2018 ha la Confederaziun dà al Center per democrazia Aarau (ZDA) l’incumbensa d’evaluar l’effect da l’agid finanzial che la Confederaziun conceda al chantun Grischun per mantegnair e per promover la lingua e la cultura rumantscha e taliana en il chantun. Ultra da quai serva questa evaluaziun al Cussegl federal sco basa per la resposta al postulat Semadeni (15.4117) «Allegra, Romanisch und Italienisch sollen leben!» ch’è vegnì acceptà dal Cussegl naziunal ils 28 da settember 2017
Ultra da quai po la Confederaziun sustegnair projects a favur da las linguas talian e rumantsch ordaifer lur territori da derasaziun tradiziunal. Per la lingua taliana vegnan sustegnids projects per rinforzar la sensibilisaziun per la lingua e cultura taliana. Vinavant pon programs da maturitad bilinguas en cumbinaziun cun il talian vegnir sustegnidas. Per la lingua rumantscha vegnan sustegnids projects che pussibiliteschan dad emprender e consolidar la lingua rumantscha e che promovan il diever. In focus spezial è sin uffants e giuvenils. Ulteriuras infurmaziuns sur las pussaivladads da promoziun chattais Vus qua:
