Categorias: praticas socialas, rituals ed occurrenzas festivas, expressiuns oralas, arts scenics, know-how en connex cun l’artisanadi tradiziunal.
Il tschaiver da Basilea è in’occurrenza ch’è fitg enconuschenta sur ils cunfins regiunals e naziunals or. El è er in dals paucs tschaivers sin quest mund che deriva d’ina tradiziun protestanta. Questa festa è in element central da l’identitad da las Basilaisas e dals Basilais e cumpiglia ultra da quai in grond spectrum da praticas musicalas, oralas ed artisanalas che fan part dal patrimoni cultural immaterial.
Al tschaiver da Basilea vegni fatg beffas da las absurditads, da las insuffizienzas e dals fauxpas da la scena politica e da la societad locala, naziunala u internaziunala durant l’onn passà. Quests temps passads vegnan caricaturads e persiflads a maun d’ina maschaida da giomias, da sgnoccas e da sarcassem. Las participantas ed ils participants fan diever tant da costums, da mascras, da laternas e da requisits bizars sco er dal dialect basilais. Il tschaiver cumenza il glindesdi che suonda la mesemna da la tschendra cun l’uschenumnà «Morgenstreich» – a bun’ura a las quatter, sin las vias stgiras dal center da la citad. La citad vegn illuminada unicamain da grondas laternas, che vegnan tratgas u purtadas, e da pitschnas laternas che las tschivladras ed ils tamburs portan sin lur mascra. Il glindesdi e la mesemna suentermezdi defileschan las cliccas en gronds cortegis. E la saira van las musicistas ed ils musicists per las vias. Il mardi suentermezdi è deditgà al cortegi d’uffants e la saira vegn animada da las «guggas». Las passa tschient gruppas da «Schnitzelbänke» che preschentan lur poesias satiricas en tschalers ed en ustarias giogan medemamain ina rolla tut speziala. Il tschaiver da Basilea è francà fermamain a Basilea ed è per ina gronda part da la populaziun in element central da l’identitad. El è pia ina tradiziun particularmain ritga che cumpiglia plirs aspects dal patrimoni cultural immaterial.
Ils 31 da mars 2016 è vegnida inoltrada a la UNESCO la candidatura dal tschaiver da Basilea cun la finamira da vegnir inscrit sin la glista represchentativa dal patrimoni cultural immaterial da l’umanitad. I sa tracta da la segunda candidatura svizra en il rom da la Convenziun da la UNESCO per preservar il patrimoni cultural immaterial.
Ils 7 da december 2017 ha il 12avel Comité interguvernamental per preservar il patrimoni cultural immaterial, reunì a Jeju (Republica da la Corea), decidì d’inscriver il tschaiver da Basilea sin la glista represchentativa.
Communicaziuns a las medias
Quest cuntegn è avant maun en tudestg, en franzos ed en talian. Cliccai per plaschair sin DE, FR u IT en il chantun sisum a dretga da questa pagina.
Documents
Links
La descripziun detagliada da la tradiziun sin la glista da las tradiziuns vivas da la Svizra
Tradiziuns parentadas
Ultra da l’elavuraziun dal dossier da candidatura per la UNESCO vegnan adattads regularmain er ils dossiers e las endataziuns correspundentas sin la glista da las tradiziuns vivas da la Svizra. Questa lavur vegn fatga en cooperaziun cun las acturas ed ils acturs pertutgads.
Links supplementars
Ultima midada 29.01.2024
Contact
Uffizi federal da cultura
Secziun da cultura e societad
Julien
Vuilleumier
Hallwylstrasse 15
3003
Berna
Telefono
+41 58 467 89 75