Categorias: arts scenics, praticas socialas, rituals ed occurrenzas festivas
La festa da la vendemia è ina gronda occurrenza per festivar la cultivaziun d’ers e da vignas. Ella ha lieu var tschintg giadas per tschientaner, en in ritmus che regorda tant a la durada da vita d’ina vit sco er a la successiun da las generaziuns umanas. Durant pliras emnas mobilisescha questa festa l’entira citad da Vevey e pretenda in grond engaschament voluntari. Ella è ultra da quai ina impurtanta funtauna da creativitad regiunala. Per mintga ediziun vegnan numnadamain sviluppads differents spectaculs e costums sco er diversas creaziuns musicalas.
La festa da la vendemia, che ha lieu circa mintga 20 onns, è ina represchentaziun teatrala da la tradiziun agricula e viticulturala, in cortegi pietus ch’è daventà ina celebraziun profana. Ella ha la finamira da render onur a la lavur dals umans ed al ciclus fritgaivel da la natira, tuts dus persunifitgads tras allegorias pajaunas, costums e simbols giudaic-cristians. La festa vegn organisada da la Confrérie des Vignerons de Vevey, mobilisescha dentant durant pliras emnas l’entira citad e pretenda in grond engaschament voluntari. Per mintga ediziun vegnan sviluppads differents spectaculs e costums sco er diversas creaziuns musicalas. La festa è pia er ina impurtanta funtauna da creativitad regiunala. L’occurrenza vegn organisada mo en temps da pasch ed è in lieu d’inscunter e da dialog per persunas da differents origins socials e culturals. La Confrérie surpiglia er la responsabladad per la communitad da las proprietarias e dals proprietaris da vignas en il Lavaux ed en il Chablais vadais, per la buna tgira da las vignas e per la remuneraziun da la lavur da las viticulturas e dals viticulturs sco er da las gidantras e dals gidanters. La festa da la vendemia n’è pia betg mo in’occurrenza spectaculara, mabain resta er stretgamain colliada cun sia motivaziun oriunda: la valurisaziun da la lavur viticulturala.
Ils 30 da mars 2015 è la candidatura da la Festa da la vendemia a Vevey vegnida inoltrada a la UNESCO cun la finamira da vegnir inscritta sin la glista represchentativa dal patrimoni cultural immaterial da l’umanitad. I sa tracta da l’emprima candidatura svizra en il rom da la Convenziun da la UNESCO per preservar il patrimoni cultural immaterial.
Il 1. da december 2016 ha il 11avel Comité interguvernamental per preservar il patrimoni cultural immaterial, reunì ad Addis-Abeba (Etiopia), decidì d’inscriver la Festa da la vendemia a Vevey sin la glista represchentativa.
Tut las decleraziuns da sustegn da la populaziun, da la Confrérie des Vignerons e da las autoritads per questa procedura da candidatura èn disponiblas sin la pagina d’internet da la Confrérie des Vignerons.
Communicaziuns a las medias
Quest cuntegn è avant maun en tudestg, en franzos ed en talian. Cliccai per plaschair sin DE, FR u IT en il chantun sisum a dretga da questa pagina.
Documents
Links
La descripziun detagliada da la tradiziun sin la glista da las tradiziuns vivas da la Svizra
Tradiziuns parentadas
Ultra da l’elavuraziun dal dossier da candidatura per la UNESCO vegnan adattads regularmain er ils dossiers e las endataziuns correspundentas sin la glista da las tradiziuns vivas da la Svizra. Questa lavur vegn fatga en cooperaziun cun las acturas ed ils acturs pertutgads.
Links supplementars
Ultima midada 29.01.2024
Contact
Uffizi federal da cultura
Secziun da cultura e societad
Julien
Vuilleumier
Hallwylstrasse 15
3003
Berna
Telefono
+41 58 467 89 75