Categorias: praticas socialas, rituals ed occurrenzas festivas, arts scenics
Questas processiuns da Pasca fan part da las festas las pli impurtantas da la Svizra taliana ed existan dapi il 17avel tschientaner. Ellas han lieu la gievgia sontga ed il venderdi sontg ed ellas regordan a l’ultima tschavera da Cristus cun ses giuvnals ed a sia crucificaziun. Ultra da quest aspect religius datti er ina impurtanta cumponenta artisanala ed artistica: la fabricaziun da laternas e da «transparents» ch’èn ornads cun motivs simbolics e biblics e che sauman il percurs da las processiuns. Intgins da quests objects èn passa 100 onns vegls e vegnan duvrads – ultra da las creaziuns pli contemporanas – anc oz.
Las processiuns da Pasca, ch’existan gia dapi la segunda mesadad dal 17avel tschientaner, han lieu la gievgia sontga ed il venderdi sontg en la citad veglia da Mendrisio. A questa chaschun vegnan las glischs da la citad stizzadas e las vias vegnan scleridas mo dals «transparents», in gener da picturas translucentas che vegnan montadas sin differents purtaders en differentas furmas e dimensiuns ed illuminadas da l’interiur.
Ils «transparents» illustreschan scenas da l’Evangeli u dal Vegl Testament. La gievgia saira giogan var 270 acturas ed acturs laics la passiun da Cristus. Chavaliers, schuldads romans e persunagis biblics vestgids en costums magnifics preschentan ina seria da scenas dals Evangelis. Il spectacul è caracterisà da l’absenza da dialog tranter ils persunagis che s’expriman unicamain cun agid da gests e da posituras silenziusas.
La processiun simpla e solenna dal venderdi è pli religiusa. Passa 700 persunas da las diversas confraternitads ed associaziuns religiusas sa participeschan a questa processiun. Ils umens portan la statua da Cristus e quella da la Dunschella da las dolurs, davant las qualas il public vegn envidà da s'enclinar. Trais corps da musica accumpognan la parada cun lur melodias funebras. Ils tamburs a chaval avran e concludan la processiun. Las processiuns da l’Emna sontga precedan il «Settenario», ina ceremonia religiusa ch’è deditgada a las set dolurs da la Dunschella.
Ils 12 da december 2019 ha il Comité interguvernamental, reunì a Bogota en la Columbia, decidì d’inscriver l’Emna sontga a Mendrisio sin la glista represchentativa dal patrimoni cultural immaterial.
Communicaziuns a las medias
Quest cuntegn è avant maun en tudestg, en franzos ed en talian. Cliccai per plaschair sin DE, FR u IT en il chantun sisum a dretga da questa pagina.
Documents
Links
La descripziun detagliada da la tradiziun sin la glista da las tradiziuns vivas da la Svizra
Tradiziuns parentadas
Ultra da l’elavuraziun dal dossier da candidatura per la UNESCO vegnan adattads regularmain er ils dossiers e las endataziuns correspundentas sin la glista da las tradiziuns vivas da la Svizra. Questa lavur vegn fatga en cooperaziun cun las acturas ed ils acturs pertutgads.
Links supplementars
Ultima midada 02.02.2024
Contact
Uffizi federal da cultura
Secziun da cultura e societad
Julien
Vuilleumier
Hallwylstrasse 15
3003
Berna
Telefono
+41 58 467 89 75