Categoria: enconuschientschas e praticas en connex cun la natira e cun l’univers
Stadis: Austria e Svizra
Questa tradiziun fa part dal patrimoni invernal alpin. Ella cumpiglia diversas tecnicas per garantir la segirezza da l’esser uman en las regiuns muntagnardas autsituadas grazia ad enconuschientschas adina meglras da la cuverta da naiv e da las «lunas da la muntogna». Ella stat per ils lioms da la populaziun alpina cun ses ambient sco er per la colliaziun dal know-how tradiziunal cun la tecnica scientifica moderna. La sintesa da tradiziun e da tecnicitad è ina caracteristica fitg originala da questa candidatura.
Dal privel da lavinas s’occupan oravant tut guidas da muntogna e responsabels da las pendicularas, che vegnan sustegnids da perscrutadras e perscrutaders spezialisads. La gestiun dal privel da lavinas cumpiglia in vast spectrum da know-how immaterial e scientific: perscrutaziun da las precipitaziuns (vent, plievgia, marschauna), da la cuverta da naiv e dals tips da floccas, sensibilisaziun d’amaturas e d’amaturs da sport d’enviern e.u.v. Questa lavur pretensiusa, che vegn exequida per amur d’ina muntogna mortala, vegn fatga tant al lieu sco er davos las culissas – lunsch davent dals maletgs d’Épinal da chauns da Son Bernard che portan in butschin vinars enturn culiez. D’ina vart sa tracti da reducir las ristgas tras indrizs da protecziun natirals u artifizials. Da l’autra vart ston skiunzas e skiunzs sco er persunas che fan turas da skis adina puspè vegnir sensibilisadas ed infurmadas davart las ristgas. Al lieu ston vegnir perscrutadas las cundiziuns e prendidas differentas mesiras da protecziun u da gestiun (p.ex. siglientar lavinas). Questa stimaziun da las ristgas vegn fatga sin basa d’enconuschientschas informalas e scientificas transmessas sur plirs tschientaners. Ella è caracterisada d’ina professiunalisaziun creschenta, necessitescha però anc adina ina enconuschientscha intima e persunala da l’ambient direct (vallada, domena e.u.v.) e cumpiglia ina impurtanta transmissiun interpersunala, er ad amaturas ed amaturs interessads.
Ils 29 da november 2018 ha il 13avel Comité interguvernamental per preservar il patrimoni cultural immaterial, reunì a Port-Louis (Republica da Maurizius), inscrit la gestiun dal privel da lavinas sin la glista represchentativa dal patrimoni cultural immaterial da l’umanitad.
Communicaziuns a las medias
Quest cuntegn è avant maun en tudestg, en franzos ed en talian. Cliccai per plaschair sin DE, FR u IT en il chantun sisum a dretga da questa pagina.
Documents
Links
La descripziun detagliada da la tradiziun sin la glista da las tradiziuns vivas da la Svizra
Tradiziuns parentadas
Ultra da l’elavuraziun dal dossier da candidatura per la UNESCO vegnan adattads regularmain er ils dossiers e las endataziuns correspundentas sin la glista da las tradiziuns vivas da la Svizra. Questa lavur vegn fatga en cooperaziun cun las acturas ed ils acturs pertutgads.
Links supplementars
Ultima midada 29.01.2024
Contact
Uffizi federal da cultura
Secziun da cultura e societad
Julien
Vuilleumier
Hallwylstrasse 15
3003
Berna
Telefono
+41 58 467 89 75